ABŞ millisinin baş məşqçisi Maurisio Poçettino DÇ-2026-nın qrup mərhələsinin 3-cü turunda Türkiyəyə 2:3 hesabı ilə uduzduqları oyundan sonra keçirilən mətbuat konfransını vaxtından əvvəl başa vurub.
Sportagon.az “The Athletic”ə istinadən xəbər verir ki, argentinalı mütəxəssis jurnalistlərin suallarının tonundan narazı qalıb.
Poçettino çıxışı zamanı komandasının qrupda birinci yeri əvvəlcədən təmin etdiyini və bu səbəbdən Türkiyə ilə matçın nəticəsinin həlledici əhəmiyyət daşımadığını vurğulayıb. Buna baxmayaraq, tədbirdə jurnalistlərin məğlubiyyətə dair əlavə sualları olub.
“Bəlkə də bunu hiss etdirmirəm, amma suallarınız bir az qəribədir. Mən də, futbolçular da razıyıq. Biz qrup birincisiyik. Çaşqınlıq içindəyəm. Bəlkə hamı elə düşünür ki, bu axşam evə qayıdan bizik, Türkiyə isə dünya çempionatında qalır? Türkiyə 3 xalı qeyd edir, Avstraliya qrupdan çıxmağı qeyd edir, Paraqvay qrupdan çıxmağı qeyd edir… Amma siz bizi qrupdakı qələbə münasibətilə təbrik etmədiniz. Bu, bir az üzücüdür. Hamıya xatırlatmalıyam ki, qrupun qalibi bizik”, – deyə o bildirib.
Qeyd edək ki, ABŞ millisi Türkiyəyə məğlub olmasına baxmayaraq, D qrupunu lider kimi başa vuraraq pley-off mərhələsinə yüksəlib.
