Litva millisinin baş məşqçisi Edqaras Yankauskas Azərbaycanla keçirəcəkləri oyundan əvvəl baş tutan mətbuat konfransında fikirlərini bölüşüb.
Sportagon.az xəbər verir ki, o, Azərbaycan millisinin Lixtenşteynlə 0:0 hesablı heç-heçəsinin komandanı daha da motivasiya edəcəyini bildirib:
“Onlar qol vura bilmədilər. Belə oyunlarda bu, baş verə bilər. Müdafiəni yarmaq asan deyil. Komanda qol vurmaq üçün əlindən gələni edə bilər, amma qapıçı yaxşı oynayır, digər zərbələr bloklanır. Belə detallar nəticəni müəyyənləşdirə bilər. Əvvəlki oyundakı mənfi nəticə Azərbaycanı daha da motivasiya edir. Eyni zamanda bu, bizi də oyuna tam kökləyir. Çünki bilirik ki, rəqib meydana çox ciddi motivasiya ilə çıxacaq”.
Yankauskas bildirib ki, heç-heçə Litvaya qrupda liderliyi qorumağa imkan verəcək. Lakin onun sözlərinə görə, komanda bu fikrə köklənməməlidir:
“Nəticənin hər iki komandanı qane edə biləcəyini bilirik. Amma bu, bizim düşüncəmizdə “heç-heçə də kifayətdir” fikri yaratmamalıdır. Təcrübəmdən bilirəm ki, qarşıdakı oyuna belə yanaşmaq düzgün deyil. Biz qələbə üçün mübarizə aparacağıq”.
Litva millisinin çalışdırıcısı komandaların bir həftə ərzində ikinci dəfə qarşılaşacağını da xatırladıb:
“Həmin oyun bərabər səviyyədə keçdi, heç bir komanda üstün deyildi. Onların da müəyyən epizodlarda təşəbbüsü var idi və qol vurdular. Biz isə bəlkə də bir-iki imkan daha çox yaratdıq. Amma ümumilikdə bərabər güclü komandaların dueli idi”.
Yankauskas Andorra ilə oyunda heyətdə etdiyi rotasiyanın özünü doğrultduğunu vurğulayıb. Onun sözlərinə görə, az oynayan futbolçular da özlərini yaxşı tərəfdən göstərə biliblər:
“Əsas futbolçularımız oyun vaxtı cəhətdən çox oynamışdılar və yorğunluğun olacağını bilirdik. Buna görə heyəti dəyişmək strategiyamızın doğru olduğunu düşünürəm. Həm start heyətində meydana çıxanlar, həm də sonradan oyuna daxil olanlar öz səviyyələrini göstərdilər. Məşqçilər üçün də sevindiricidir ki, daha çox futbolçu bu səviyyədə oynaya biləcəyini sübut etdi”.
