Lixtenşteyn millisinin baş məşqçisi Konrad Fünfştük UEFA Millətlər Liqasının D Liqasının 2-ci qrupunda Azərbaycanla keçirilən oyundan (0:0) sonra matç barədə danışıb.
Sportagon.az xəbər verir ki, mütəxəssis Azərbaycanda olmaqdan və komandasının əldə etdiyi nəticədən məmnun olduğunu bildirib:
“Birinci dəfədir Azərbaycandayam. Burada olmaqdan şadam. Azərbaycan mədəniyyəti ilə tanış olduq”.
– Oyun başa çatdıqdan sonra böyük coşqu ilə bunu qeyd etdiniz. Bunun səbəbi nə idi?
– 40 min əhalisi olan ölkə üçün biz oyundan öncə favorit deyildik. Bu oyuna yaxşı hazırlaşmışdıq. Azərbaycan millisinin 20 milyon avro dəyəri var. Bu gün belə nəticə əldə etməyimiz bizi sevindirdi. Ona görə də bunu böyük coşqu ilə qeyd etdik.
– Komanda hücum baxımdan yaxşı oynadı. Bu haqda nə deyərdiniz?
– Biz hər xala sevinirik. Çoxlu qol şanslarımız oldu. Amma yenə də özümüzü inkişaf etdirməli, daha yaxşı olmalıyıq. Hər oyunda inkişaf edirik. Bu gün də 2-3 qol imkanımız oldu və qalib gələ bilərdik. Təəssüf ki, alınmadı. Qarşıdakı oyunlara baxacağıq.
– Həqiqətən Lixtenşteyn millisinin üzvlərinin 80-90 faizi başqa sahələrdə çalışır və oyunlara görə milliyə qoşulurlar?
– Bəli, doğrudur, biz peşəkar komanda deyilik. Hər bir komanda kimi bizim də planımız var. Amma Lixtenşteyn millisinin futbolçularının çox az hissəsi yalnız futboldan qazandığı maaşla dolanır. Onlar başqa sahələrdə çalışaraq maaş alırlar. Amma öz planlarımız var və daim inkişaf etmək istəyirik.
