“Mançester Yunayted”in baş məşqçisi Maykl Kerrik yarımmüdafiəçi Karlos Balebanın zədə səbəbindən qarşıdakı matçlarda komandaya kömək edə bilməyəcəyini bildirib.
Sportagon.az xəbər verir ki, Mançester təmsilçisinin yeni oyunçusu zədəni “Brayton”un heyətində mövsümöncəsi hazırlıq zamanı alıb. Kerrik kamerunlu dayaq yarımmüdafiəçisinin bir neçə həftə yaşıl meydanlardan uzaq qalacağını bildirib:
“Onun topuq nahiyəsində kiçik problemi var. Balebanın zədəsi bəlkə də bir neçə həftə, bəlkə də 3 həftə çəkəcək – görəcəyik. Lakin biz bundan əvvəlcədən xəbərdar idik. Ona görə də bu, hər hansı ciddi problem deyil. Vaxtı gələndə onu yenidən meydanda görmək əla olacaq. Biz Karlosdan məmnunuq və hesab edirik ki, onun potensialı var. Bu, həqiqətən də bizim üçün həyəcanverici transferdir”.
Qeyd edək ki, “Mançester Yunayted” Karlos Balebanı 3 gün əvvəl 76 milyon avro qarşılığında “Brayton”dan transfer edib. 22 yaşlı futbolçu “qırmızı şeytanlarda 5 illik müqavilə imzalayıb.
