Yeni mövsüm üçün heyətini gücləndirməyə davam edən “Araz-Naxçıvan” yeni transfer reallaşdırıb.
Sportagon.az xəbər verir ki, Naxçıvan təmsilçisi ispaniyalı yarımmüdafiəçi Alberto Qarsia Fernandeslə anlaşıb.
30 yaşlı futbolçu ilə 1 illik müqavilə imzalanıb. O, yeni mövsümdə “qırmızı-ağlar”ın uğurları üçün çalışacaq.
“Real”ın yetirməsi olan Alberto Qarsia Fernandes karyerası ərzində İspaniyanın “Kastilya”, “Fuenlabrada”, UKAM, “Sabadel” və “Rayo Maxadaonda” klublarında çıxış edib. Təcrübəli yarımmüdafiəçi həmçinin Kiprin “Omoniya” və “Akritas Xloraka” komandalarının da formasını geyinib.
Qeyd edək ki, Fernandes 2017-ci ildə İspaniyanın U-19 millisində bir oyun keçirib.
Xatırladaq ki, “Araz-Naxçıvan” bundan əvvəl Tərlan Əhmədli, Ömər Buludov, Slavik Alxasov, İbrahim Piriyev, Ülvi İsgəndərov, Rəşad Həsənov və Luka Dumançiçlə yeni müqavilə bağlayıb.
