FİFA prezidenti Canni İnfantino DÇ-2026-da bütün oyunlarda tətbiq edilən su fasilələrinin səbəbi barədə danışıb.
Sportagon.az FİFA-nın saytına istinadən xəbər verir ki, qurum rəhbəri qərarın yalnız hava şəraiti ilə bağl olduğunu bildirib.
“Əsas səbəb isti havadır. Nəzərə almalıyıq ki, dünya çempionatı kimi 39 gün davam edən turnirdə komandalar potensial olaraq 8 oyun keçirə bilərlər. Buna görə də futbolçuların qısa müddət dincəlmək imkanı əldə etməsi çox vacibdir”, – deyə İnfantino qeyd edib.
O, bütün komandalar üçün bərabər şərait yaratmağın da vacib olduğunu vurğulayıb: “Bizim üçün daha önəmlisi odur ki, hər matçda bütün komandalar eyni şərtlərdə çıxış etsin. Bir oyunda hava daha isti olduğu üçün məşqçinin komandaya əlavə göstəriş vermək imkanı əldə etməsi, digər oyunda isə belə imkanın olmaması ədalətli deyil. Buna görə də fasilələri bütün matçlarda tətbiq edirik”.
İnfantino bu qərarın maliyyə məqsədi daşımadığını da qeyd edib:
“Bu fasilələr FİFA-ya əlavə gəlir gətirmir. Bütün kommersiya müqavilələri əvvəlcədən imzalanıb. Ona görə də bu, maliyyə məsələsi deyil, sırf idman məsələsidir”.
FİFA prezidenti hesab edir ki, fasilələr futbolçuların oyunun son dəqiqələrində də yüksək temp saxlamasına kömək edir:
“Oyunun son saniyələrinədək futbolçular hücum edir və aktiv oynayırlar. Ola bilsin ki, buna həmin qısa fasilələr də təsir göstərir. Futbolçular dincəlib meydançaya qayıdır və öz imkanlarını nümayiş etdirirlər”.
Qeyd edək ki, DÇ-2026-da su fasilələri 22-ci və 67-ci dəqiqələrdə keçirilir və hər biri 3 dəqiqə davam edir. Bu vaxt sonradan kompensasiya olunmuş vaxta əlavə edilir. Belə praktika dünya çempionatları tarixində ilk dəfə tətbiq olunur.
