“Sabah”ın futbolçusu Timoteuş Puhaç (Tymoteusz Puchacz) UEFA Çempionlar Liqasının Liqa mərhələsinə vəsiqə qazandıqdan sonra yaşadığı emosiyalardan danışıb.
Sportagon.az Polşa mətbuatına istinadən xəbər verir ki, 27 yaşlı müdafiəçi “Foot Truck”a açıqlamasında “Hapoel” (Beer-Şeva, İsrail) üzərindəki qələbədən sonra göz yaşlarını saxlaya bilməməsinin səbəbini izah edib.
Puhaç bildirib ki, bir il əvvəl “Sabah”a keçərkən onun ünvanına səsləndirilən tənqidlər də həmin anda keçirdiyi hisslərə təsir edib: “Bunu təsvir etmək çətindir. Həmin an nə hiss etdiyimi bilmirəm. Bu, arzunun gerçəkləşməsi idi, amma eyni zamanda bir il əvvəl baş verənlərə də cavab idi. “Sabah”a keçidimdən demək olar ki, düz bir il ötüb. İnternetdə haqqımda xoşagəlməz fikirlər görürdüm. Yazırdılar ki, artıq peşəkar futbolçu deyiləm, məni ciddi qəbul etmək olmaz.
Bütün bunlar – arzunun gerçəkləşməsi və yaşananlar – emosiyaların üzə çıxmasına səbəb oldu. “Orhus”la oyundan sonra Çempionlar Liqasında oynaya biləcəyimi düşünəndə də bir neçə damla göz yaşı axıtmışdım. Mən həssas biriyəm”.
Polşalı futbolçu həlledici görüşün sonlarında artıq emosiyalarını cilovlaya bilmədiyini söyləyib: “Karyeramın bu mərhələsində futbolda həmişə mənə təsir edən emosiyaları idarə etməyi bacarıram. Daha ağıllı oynadığımı, başqa oyun üslubu göstərdiyimi düşünürəm. Amma orqanizmi aldatmaq olmur. Artıq paltardəyişmə otağında ürəyimin necə döyündüyünü hiss edirdim. Orqanizm qeyri-adi bir şeyin baş verdiyini anlayırdı. Hesab 4:2 olanda ağlamağa başladım. 5:2-dən sonra isə özümü saxlaya bilmirdim”.
Puhaç “Hapoel”lə matçda etdiyi məhsuldar ötürməyə də toxunub: “Assist? Künc zərbəsini bir qədər uzağa göndərdim. Bu, “Sabah”da keçirdiyim ən yaxşı oyun deyildi”.
Qeyd edək ki, “Sabah” “Hapoel”i cavab qarşılaşmasında 5:2 hesabı ilə məğlub edərək (ilk oyun 1:2) tarixində ilk dəfə Çempionlar Liqasının Liqa mərhələsinə yüksəlib.
Əlavə edək ki, Puxaç ÇL-in təsnifat mərhələsində ən çox qol ötürməsi (5 dəfə) edən futbolçu olub.
