“Aston Villa” heyətini İsveçrə millisinin yarımmüdafiəçisi Yohan Manzambi ilə gücləndirib.
Sportagon.az xəbər verir ki, bu barədə klub məlumat yayıb. 20 yaşlı futbolçu Almaniyanın “Frayburq” klubundan Birminqem təmsilçisinə keçib.
Klub transferin maliyyə detalları barədə məlumat verməsə də, “Sky Sports” nəşri keçidin dəyərinin 50 milyon funt sterlinqdən çox olduğunu bildirib. Bu, həm İsveçrə futbolu tarixində ən bahalı transfer, həm də “Aston Villa”nın rekord alışı olub.
Qeyd edək ki, Manzambi DÇ-2026-dakı uğurlu çıxışı ilə diqqət mərkəzinə düşüb. O, İsveçrə millisinin 72 ildən sonra ilk dəfə dünya çempionatının 1/4 finalına yüksəlməsində mühüm rol oynayıb. Yarımmüdafiəçi mundialda keçirdiyi 4 oyunda 3 qol vurub, 2 məhsuldar ötürmə edib. Lakin 1/8 final mərhələsi ərəfəsində məşq zamanı dizindən zədələndiyi üçün turniri erkən başa vurub.
